උසස් පෙළ විද්‍යා, ගණිත සහ තාක්ෂණ අධ්‍යාපන අවස්ථා අහිමිව තිබූ ත්‍රිකුණාමල දිස්ත්‍රික්කයේ සේරුවිල අධ්‍යාපන කොට්ඨාසයේ දරුවන්ට එකී අහිමි අධ්‍යාපන අවස්ථා හිමි කර දෙමින් උසස් පෙළ විද්‍යා, ගණිත සහ තාක්ෂණ විෂය ධාරාවන් සහිත නව පාසලක් 2024 පෙබරවාරි මස 15 වන දින සේරුවිල මංගල රාජමහා විහාරාධිපති පූජ්‍යපාද අළුදෙණියේ සුබෝධි නාහිමිපාණන් වහන්සේ විසින් සේරුවිල මංගල රාජමහා විහාරස්ථානයෙහි ස්ථාපිත කරනු ලැබුවා. මේ අයුරින් උසස්පෙළ විද්‍යා හා තාක්ෂණ විෂයයන් සේරුවිල අධ්‍යාපන කොට්ඨාසයේ ඉගැන්වෙන්නේ ඉතිහාසයේ ප්‍රථම වතාවටයි. දෙමාපියන් දරුවන් ඇතුළු සේරුවිල ප්‍රදේශවාසීන් කැවුම් කිරිබත් පිස මේ අවස්ථාව ඉමහත් සතුටින් සමරනු ලැබුවා.
මෙම පාසලේ ආචාර්ය මණ්ඩලය උපාධිධාරී ගුරුවරුන්ගෙන් සමන්විතවන අතර පාසලේ ආරම්භක විදුහල්පති ලෙස සේරුවිල නාහිමියන්ම කටයුතු කරනු ලබනවා. එමගින් නව දැක්මකින් යුතු පාසලක් නිර්මාණය කිරීමට උන්වහන්සේ පෙරමුණ ගෙන කටයුතු කරනු ලබනවා.